Служба Игнатию Мариупольскому, Митрополиту Готфейскому и Кафайскому

НА ВЕЛИКОЙ ВЕЧЕРНИ

Блажен муж: 1-й антифон. На Господи, воззвах: стихиры праздника на 3, глас 1.

Подобен: Небесных чинов:

Творец всяческих и Избавитель наш / Материю Девою в церковь приносится, / темже старец, Сего прием, / с радостию взываше: / ныне отпущаеши раба Твоего, Блаже, с миром, / якоже изволил еси.

Симеон, на руки от Девы прием / прежде всех век рожденнаго / Спаса видех, вопияше: / просвещение Твоея славы концем; / ныне отпущаеши раба Твоего, Блаже, с миром, / яко видех Тя днесь.

Напоследок веков рождена на спасение человеков, / Симеон, понесый на руках Спаса, / радуяся, вопияше: / видех Свет языков и славу Израиля, / ныне же отпущаеши, якоже рекл еси, яко Бог, / от сущих зде велением Твоим.

стихиры святаго, глас 4:

Приидите, вернии, / с лики ангельскими воспоем / богоблаженнаго святителя Игнатия, / мудре упасшего стадо словесных Христовых овец, / той бо явися сосуд благодати Духа Святаго, / преизливающий милости, любовию его почитающим.

Отца духоноснаго и молитвенника теплейшаго, / богомудраго святителя Игнатия, / радующеся, днесь песньми прославим / и, воспоминающе болезни и труды его, / возвеличим преславное заступление / и ходатайство его дерзновенное, / прося душам нашим оставления прегрешений / и Божественныя милости.

Грядите православных собори, / почтим днесь отца духоноснаго, / звезду новоявленную Неба Церковнаго, / путеводящую нас в странствии земном, / светолепнаго святителя Игнатия / и любовию возопиим ему: / спасай нас молитвами твоими,/ теплый наш предстателю / и граду Мариуполю заступление.

Стецемся любовию людие, / к торжеству славнаго архиерея Божия, / Таин Христовых неленастнаго служителя,/ паствы своея богомудраго учителя, / предивнаго святителя Игнатия / и песненными похвалами воспоем, глаголюще: / радуйся, отцев красото и преподобных славо, / радуйся, христианскаго благочестия блюстителю, / радуйся, еллинов похвало / и граду Пречистой Девы утверждение.

Притецем вернии, / к мощем святителя Игнатия, / и пролием пред ним моление / и скорби возвестим сердечныя / да обрящем утешение велие, / той бо есть пастырь благостный / и помощник скорый: всяк бо веруяй не отыдет тощ.

Слава, глас 6:

Богоносне преблаженне Игнатие, / жезлом кротости и правды / добре упасл еси единокровныя ти люди, / нравом Моисеовым подобяся, / от работы агарянския тех свободил еси / и премудрый наставник явился еси. / Ныне же предстоя Господу Славы / молися за град твой и люди / благочестно величающия тя.

И ныне, глас тойже:

Да отверзется дверь небесная днесь: Безначальное бо Слово Отчее начало приим под леты, не отступль Своего Божества, от Девы яко Младенец четыредесятодневен, Материю вольне приносится в Церковь законную: и Сего на руки приемлет старец, отпусти, зовый, раба, Владыко: ибо очи мои видеста спасение Твое, пришедый в мир спасти род человечь, Господи, слава Тебе.

Вход. Прокимен дне, и чтения 3.

Причтей чтение(главы 10, 3 и 8):

Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея; в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку: и блажен человек, иже пути моя сохранит: исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз, премудрость, устроих совет и разум и смысл аз призвах: мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая; яко истине поучится гортань мой, мерзки же предо мною устны лживыя. С правдою вси глаголы уст моих; ничтоже в них стропотно, ниже развращенно. Вся права суть разумевающим и проста обретающим разум. Научаю бо вас истине, да будет о Господе надежда ваша, и исполнитеся Духа.

Причтей чтение (главы 10 и 11):

Уста праведнаго каплют премудрость: язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем: вес же праведный приятен Ему. Идеже аще внидет досаждение, тамо и безчестие: уста же смиренных поучаются премудрости. Совершение правых наставит их, и поползновение отрицающихся упасет их. Не пользуют имения в день ярости, правда же избавит от смерти. Умер праведный, остави раскаяние: наручна же бывает и посмеятельна нечестивых пагуба. Правда непорочнаго исправляет пути, в нечестие же падает неправда. Правда мужей правых избавит их: безсоветием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, вместо же его предается нечестивый. Во устех нечестивых сеть гражданом, чувство же праведных благопоспешное. Во благих праведных исправится град, усты же нечестивых раскопается. Ругается гражданом лишенный разума, муж же мудрый безмолвие водит.

Премудрости Соломоновы чтение ( глава 4):

Праведник, аще постигнет скончатися в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше, и не разумевше, ниже положше в помышлении таковое: яко благодать и милость в преподобных Его, и посещение во избранных Его.

На литии стихиры храма и святаго, глас 5:

Святителю, отче Игннатие, / разумнаго света заре, / церковное светило, святительская красото, / иноческаго постнаго жития истовое правило: / нам же заступник явился еси, / свобождая от губителя врага душы наша.

Слава и ныне, глас 5:

Ветхий Деньми / младенствовав плотию, / Материю Девою в церковь приносится, / Своего закона исполняя обещание. / Егоже Симеон приим глаголаше: / ныне отпущаеши с миром, / по глаголу Твоему, раба Твоего: / видеша бо очи мои спасение Твое, Святый.

На стиховне стихиры, глас 2:

Подобен: Доме Евфрафов:

Доме Пречистыя, / граде Марии Девы, / со Игнатием блаженным / радостно ликуя, / прослави свою Владычицу - Богородицу.

Стих: Чесна пред Господем смерть преподобных Его.

Святителей украшение, / преподобных славо, / Игнатие досточудне, / приими от чад твоих / песни хвалебныя.

Стих: Блажен муж, бояйся Господа, в заповедех Его восхощет зело.

Пастырю добрый, / Игнатие богомудре, / услыши моления наша / и спаси град и люди / благочестно чтущих тя.

Слава, глас тойже:

Троицы вернаго служителя, / Церкве светильника всесветлаго, / Игнатия предивнаго / ныне, в память его сошедшеся, / воспоим любовию.

И ныне, глас тойже:

Доме Господень, / Храме святый, / украсися славою / сретая Владыку Вселенныя, / во плоти пришедшаго.

На благословении хлебов тропарь святаго дважды и тропарь Сретению единожды:

Тропарь святаго, глас 4:

Вторый Моисей явился еси, / святителю отче Игнатие, / той бо избранный народ спасл есть от рабства египетскаго, / ты же христиан избавил еси от мучительства агарянскаго, / сего ради в вышних венцем славы украшен. / Моли Христа Бога всей державе нашей / и граду твоему в мире спастися.

Тропарь праздника, глас 1:

Радуйся, Благодатная Богородице Дево, / из Тебе бо возсия Солнце Правды Христос Бог наш, / просвещаяй сущия во тьме: / веселися и ты, старче паведный, / приемый во объятия Свободителя душ наших, / дарующаго нам воскресение.

НА УТРЕНИ

На Бог Господь: тропарь праздника дважды.

Слава, святаго, и ныне, праздника.

    По 1-м стихословии седален, глас 1:

Служитель быв Христу всяческих Владыце, научил еси люди, и просветил еси Божественным Крещением, к разумению сего наставль святителю отче Игнатие: темже проповедника тя истины вси именуем, святителя и угодника Христова.

Слава, и ныне, глас тойже:

Лик Ангельский да удивится чудеси: земнии же гласы возопием пение, зряще неизреченное Божие снизхождение. Егоже бо трепещут небесныя силы, ныне старчи объемлют руце Единаго Человеколюбца.

По 2-м стихословии седален, глас 1:

От юности взем крест твой, благочестно Христу последовал еси, увядив плотское мудрование воздержанием: темже на святительстем седалищи сед святителю, возвеличил еси Владыку, и Того Пречистую Матерь, различными даровании твою украсивша раку, Игнатие, богоблаженне.

Слава, и ныне, глас 1:

Сый со Отцем на престоле святем, пришед на землю от Девы родися и Младенец бысть леты сый неописан, Егоже приим Симеон на руки радуяся глаголаше: ныне отпущаеши, Щедре, возвеселив раба Твоего.

По полиелеи седален святителю, глас 8:

Боговещаннаго Аггея проречение исполняется: / в храме Господни желаемый всеми народами, / яко младенец является, / освящая Церковь плотским пришествием Своим / и благодать божественную дарует всем людем, / еюже ты, отче священне Игнатие, / сугубо воспламенился еси: / от апостолов восприяв огнь Премирнаго Утешителя, / и явился еси пастве твоей светильник всечудный / и наставник богомудрый.

Слава, и ныне, праздника, глас тойже:

Пречистою Девою / Христос Спас наш в церковь приносится / и храмы Духа Святаго / души и телеса наша содевает, / темже кланяющеся честным мощем святителя Игнатия богомудраго, / молимся Тебе Преблаже: / освяти и спаси души наша, / Превечный Свете, Боже наш, просвещающий мир.

Таже степенна, 1-й антифон, глас 4. Прокимен, глас 4: Уста моя возглаголют премудрость, / и поучения сердца моего разум. Стих: Услышите сия, вси языцы, / внушите, вси, живущие по вселенней. Всякое дыхание: Евангелие от Иоанна, зачало 35.

По 50-м псалме стихира самогласна, глас 6:

Святителю Игнатие богомудре, / днесь град твой похвалы тебе приносит, / людие во светлей памяти твоей радуются / и единым сердцем и устны вопиют: / радуйся, отче священнейший, / готовый душу за паству положити; / радуйся, святителей красото, церковная доброто; / радуйся, образе чистоты и правды; / радуйся, предстателю наш присный и заступниче, / молися о душах наших.

Канон праздника со ирмосом на 6 и святителя на 8.

Канон праздника, глас 3.

Песнь 1

Ирмос: Сушу глубородительную землю солнце нашествова иногда: яко стена бо, огусте обаполы вода, людем пешомореходящим и богоугодно поющим: поим Господеви, славно бо прославися.

Да каплют воду облацы, солнце бо на облаце легце носимо настало есть, на нетленную руку, Христос в Церкви яко Младенец. Темже, вернии, возопиим: поим Господи славно бо прославися.

Крепитеся, руце Симеони, старостию ослабленнии, нозе же претружденна старча, правобыстро движитася Христу на сретение, лик со бесплотными составльше поим Господи, славно бо прославися.

Разумом простертая Небеса, веселитеся, и радуйся, земле: из Пребожественных бо недр Божественная Мудрость прошед Христос, Материю Девою Богу Отцу приносится Младенец, Иже прежде всех, славно бо прославися.

Ин канон святителя, глас 8.

Ирмос: Песнь возслем, людие, чудному Богу нашему, свободившему Израиля от работы, песнь победную поюще и вопиюще, поим Тебе, Единому Владыце.

Отверзи мои недостойнии устне, Владыко Христе, и даждь ми слово разума воспети достойно память дивнаго угодника Твоего блаженнаго Игнатия, ныне со ангелы предстоящаго Тебе и молящагося, во еже избавитися нам от злаго обстояния.

От юности на безстрастия гору восшед, невозвратно Христу последовал еси и, духовную мудрость стяжав, в богоразумии люди, отче, возрастил еси.

Плод красный родителей твоих явился еси, отче святе Игнатие, послушанием из млада украсився. Темже паству твою в любви и послушании Христовом возрастил еси.

Богородичен: Христа Вышняго Царя, Матерь Чистая и Одушевленная Палато. Радуйся, Владычице, Тобою бо нерушимь наш град сохраняется.

Песнь 3

Ирмос: Утверждение на Тя надеющихся, утверди, Господи, Церковь, юже стяжал еси Честною Твоею Кровию.

Перворожден из Отца прежде век, перворожден Младенец из Девы Нетленныя, Адаму руку простирая, явися.

Младоумна бывша прелестию первозданнаго, паки исправляяй Бог Слово, младенствовав, явися.

Земли исчадие паки потекшее в ню Божества сообразное естество Зиждитель, яко непреложне, младенствовав, яви.

Ин канон:

Ирмос: Несть свят, яко Господь, и несть праведен, яко Бог наш, Егоже поет вся тварь: несть праведен, паче Тебе, Господи.

Земли Эллинския чудное прозябение, града нашего светильниче пресветлый, в небесных обителех водворяяся, не престай молитвами твоими посещати чад твоих.

Никтоже возможет, святителю, по достоинству твоея святыни величия поведати. Обаче мы, любовию твоею побеждаеми прославляем подвиги твоя.

По глаголу великаго Павла, всем вся был еси: печальным - утешитель, страждущим - отрада, темже не остави нас, чад твоих, прилогами бо вражими присно обуреваеми.

Богородичен: Ликуют вси человецы, и ангели согласно вопиют на небеси и на земли: радуйся, Тебе зовуще,Ты бо радости всяческая исполнила еси Рождеством Твоим.

Кондак празднику, глас 1:

Утробу Девичу освятивый рождеством Твоим / и руце Симеоне благословивый / якоже подобаше, предварив, / и ныне спасл еси нас, Христе Боже: / но умири во бранех жительство, / Едине Человеколюбче.

Икос:

К Богородице притецем хотящии Сына Ея видети, к Симеону носима, Егоже с небесе бесплотнии видяще, дивляхуся, глаголюще: чудная зрим ныне и преславная, непостижима, несказанная Иже бо Адама создавый носится яко Младенец: Невместимый вмещается на руках старчих: Иже в недрех неописанных Сый Отца Своего волею описуется плотию, а не Божеством, Един Человеколюбец.

Седален святителю, глас 4:

Пастырю добрый, Игнатие досточудне, Божественным духом просвещен, люди твоя верно упасл еси. Темже любовию почитаем болезни и труды твоя: Отечеству нашему испроси мир и душам нашим велию милость.

Слава и ныне, седален праздника, глас тойже:

На горе Синайстей древле виде Моисей задняя Божия и тонкий Божественный глас сподобися во мраце же и вихре слышати: ныне же Симеон воплощеннаго Бога, непреложне нас ради на руки прият радостно тщашеся ити от сущих зде к животу вечному. Темже вопияше: ныне отпущаеши раба Твоего, Владыко.

Песнь 4

Ирмос: Покрыла есть небеса добродетель Твоя, Христе, из кивота бо прошед святыни Твоея нетленныя Матере, в храме славы Твоея явился еси, яко Младенец руконосимь: и исполнишися вся твоего хваления.

Радуйся, Симеоне, неизреченных таинниче, Богородице вопияше, Егоже от Святаго древле известися тебе Духа, младенствовавшаго Слово Христа на руки приими, зовый Ему: исполнишася вся Твоего хваления.

На Негоже уповал еси, Симеоне, возраст детищный, радуяся, подыми Христа, Израиля Божественнаго утешение, закона Творца и Владыку, исполняющаго заккона чин, зовый Ему: исполнишася вся Твоего хваления.

Видя Симеон Слово Безначальное с плотию яко на престоле Херувимстем Девой носимо, Виновнаго еже быти всяческих, яко Младенцу дивяся, вопияше Ему: исполнишася вся Твоего хваления.

Ин канон:

Ирмос: Из горы приосененныя, Слове, пророк, единыя Богородице, хотяща воплотитися боговидно усмотри и со страхом славословяше силу Твою.

Земле благая явился еси, священный отче, семя слова Божия восприявый и плод сторичный Владыце твоему принесл еси.

Плотская мудрования воздержанием и труды умертвил еси, святитель божествен показался еси, и предстатель Троицы всесвящен.

Яко Божий служитель с вышними лики предстоя, о нас прилежно, отче преподобне, помолися, получити нам вечная благая.

Богородичен: Благая Заступнице наша, Дево Пречистая, градов и весей напобедимое в бедах хранилище, и на враги побеждение.

Песнь 5

Ирмос: Яко виде Исаиа образно на престоле превознесена Бога, от Ангел славы дориносима, о окаянный, вопияше аз: провидех бо воплощаема Бога, Света Невечерня и миром владычествующа.

Разумев Божественный старец проявленную древле пророку славу, руками Слово зря Матерними держиму. О радуйся, вопияше, Чистая, яко престол бо держиши Бога, Света Невечерняго и миром владычествующа.

Поклонься старец и стопам Божественне прикоснувся Неискусобрачныя и Богоматере: огнь, рече, носиши, Чистая, Младенца боюся объяти Бога, Света Невечерняго и миром владычествующа.

Очищается Исаиа, от Серафима угль приемь, старец вопияше Богоматери: Ты якоже клещами руками просвещаеши мя, подавше Егоже носиши, Света Невечерняго и миром владычествующа.

Ин канон:

Ирмос: Страстей мя мглы, яко от глубокия нощи, избавляяй, утреневати сподоби дух мой, молюся, во свете дне повелений Твоих, Христе.

Ныне собрашася чада твоя, отче Игнатие, светло память твою празднующе, и молят тя: огради стадо твое от волков губящих е.

Приидоша ныне вернии люди, припадающе к честным мощем твоим, просяще от тебе здравия и спасения, Христа величающе.

Житие твое священно, и слово Божественно, молитвами твоими, преблаженне Игнатие, омраченныя души наша просвети, яко да, в след Христа грядуще, славим тя.

Богородичен: Христа Бога нашего Мати, жилище и дом неизреченныя и пребожественныя славы Его! О радуйся, палато преукрашенная и граде одушевленный присно царствующий.

Песнь 6

Ирмос: Возопи к Тебе, видев старец очима спасение, еже людем прииде от Бога: Христе, Ты Бог мой.

Сиону Ты камень возложился еси, непокоривым претыкание и соблазна камень: нерушимое верных спасение.

Известне нося начертание Иже прежде век Тя израстившаго, земных за милосердие ныне немощию обложися.

Сыну Вышняго, Сыну Девы, Богу, Отрочати бывшему, поклоншася Тебе ныне отпусти с миром.

Ин канон:

Ирмос: Содержима мя, приими, Человеколюбче грехи многими, и припадающа щедротам Твоим, яко пророка, Господи, и спаси мя.

Непрестанно стадо твое научал еси Божественным учениям Христовым. Якоже Божий архиерей Жертву Безкровную Господеви приносил еси. Емуже, яко Подвигоположнику, подобяся, положил еси душу за овцы своя, темже, обстояще раку мощей твоих, взываем ти, отче Игнатие: непрестай молитися о нас ко Господу.

Якоже Божий служитель явился еси, отче Игнатие, пребывая в терпении мнозем, в скорбех, в бедах, в теснотах. Ведал бо еси, яко любящим Бога вся во благое споспешествует и благодарным сердцем Триипостаснаго Бога величал еси.

Не терпел еси, отче, зрети веру Христову поругаему агарянским зловерием и христолюбивыя люди твоя спасл еси от нечестия. Темже молим тя: в православии град твой сохрани, расколы и ереси попаляя.

Богородичен: Радости вся исполнила еси, вышния и нижния Ты совокупила еси, Владычице Богородице. Темже радостно и согласно ныне, небо и вся земля величает Тя.

Кондак святителю, глас 8:

Днесь град Мариуполь тобою хвалится, / в честь Девы Марии для верных тобою основанный, / в нем бо молитвами и чудесами просиял еси, святителю отче Игнатие. / Темже имея дерзновение ко Господу, / поминай нас, чтущих святую память твою.

Икос:

Ангелов собеседниче и Едемскаго сада древо доброплодное, града Мариуполя похвало и земли нашея великий светильниче, отче преблаженне, богомудре, святе Игнатие, духовное разумение приим, подаждь и нам разумно песньми воспети тя. Ты же имея дерзновение ко Господу, поминай нас, чтущих святую память твою.

Песнь 7

Ирмос: Тебе во огни оросившаго отроки богословившия и в Деву Нетленну всельшагося Бога Слова поим, благочестно поюще: благословен Бог отец наших.

Адаму известити хотяй иду, во аде живущу, и Еве принести благовестие, Симеон вопияше, со пророки ликуя: благословен Бог отец наших.

Рода земна избавляяй Бог, даже до ада приидет: пленным же подаст всем оставление и прозрение слепым, яко и немым вопити: благословен Бог отец наших.

И Твое сердце, Нетленная, оружие пройдет, Симеон Богородице провозгласи, на Кресте зрящи Твоего Сына, Емуже вопием: благословен Бог отец наших.

Ин канон, святителю:

Ирмос: На поле Деире иногда мучитель пещь постави на мучение Богоносных, в нейже три отроки песнословляху Единаго Бога, троично воспеваху, глаголюще: отцев Боже, благословен еси.

Добродетельми красуяся, величием подвигов твоих возсиял еси и вся земныя концы озарил еси, богомудре Игнатие. И душ наших мрак разжени, да присно Христа величаем.

Обстояще честную раку многоценных мощей твоих, восхваляем тя любовию, и просим, учителю и наставниче наш, в Православии утверди ны, зловерие и нечестие упраздни, да присно Христа величаем.

Ничтоже возмогоша отлучити тя, отче, от любве Божия: ни скорбь, ни теснота, ни нагота, ни глад: дух бо твой в Бозе утвердив, вся находящия на тя беды радостным сердцем претерпел еси, присно Христа величая.

Богородичен: Радуйся, Премилостивая Богородице, бдящая и молящаяся о нас со святым Игнатием к Богу, и всякия злобы и скорбей ходатайством Твоим нас избавляющая.

Песнь 8

Ирмос: Нестерпимому огню соединившеся, благочестия предстояще юноши, пламенем же невреждени, Божественную песнь пояху: благословите, вся дела Господня, Господа и превозносите во вся веки.

Людие Израилевы, Твою славу Емануила, зряще Отроча из Девы, пред лицем Божественнаго ковчега ныне ликуйте: благословите, вся дела Господня, Господа и превозносите во вся веки.

Се Симеон вопияше, пререкаемое знамение Сей будет: Бог Сый и Отроча. Сему, вернии возопиим: благословите, вся дела Господня, Господа и превозносите во вся веки.

Живот сый, Сей будет падение непокоривым, младенствовав Бог Слово, яко восстание всем верою поющим: благословите, вся дела Господня, Господа и превозносите во вся веки.

Ин канон:

Ирмос: Победители мучителя и пламене благодатию Твоею бывше, заповедем Твоим зело прилежаще, отроцы вопияху: благословите, вся дела Господня, Господа.

Людие твои, отче Игнатие, предзряща тя священна, возлюбиша житие твое, Божественнаго учения исполненное и, величающе Дивнаго во святых Своих Бога, вопиют: благословите, вся дела Господня, Господа.

Агарянское нечестие посрамил еси, воплощеннаго Христа богословил еси, святителю премудре, и вся верныя Троице Единосущней и Нераздельней пети научил еси: благословите, вся дела Господня, Господа.

Боговидцу Моисею подражав, житие твое кротко жительствовал еси, и Егоже он на горе Синайстей во образах виде, ты в Божественней Евхаристии приобщался еси, и верныя вся призывал еси к Безсмертней Трапезе, научая пети: благословите, вся дела Господня, Господа.

Богородичен: Радуйся лукавых духов прогонительнице, Богородице Дево. Радуйся, яко Тебе небесная невидимая воинства славословят всегда, и величают яко Матерь Божию бывшую и нижняя с вышними сочетавшую.

Песнь 9

Ирмос: В законе сений и писаний образ видим, вернии: всяк мужеский пол, ложесна разверзая, свят Богу Тем Перворожденное Слово Отца Безначальна, Сына первородящася Материю неискусомужно, величаем.

Иже древним новорожденных горличищ супруг, двоица же бяше птенцев, в нихже место божественный старец и целомудренная Анна пророчица, от Девы рожденному и Сыну Единородному Отчу, в церковь приносиму, служат величающе.

Воздал еси мне, вопияше Симеон, спасения Твоего, Христе, радование, восприими Твоего служителя сению претружденнаго, новыя благодати священнопроповедника тайнаго, во хвалении величающа.

Священнолепно исповедашеся Анна прорицающе, целомудренная и преподобная, и старица, Владыце в церкви явственно: Богородицу же проповедающи всем сущим величаше.

Ин канон, святителю:

Ирмос: Проявленное на горе законоположнику во огни и купине Рождество Приснодевы в наше, верных, спасение песньми немолчными величаем.

Твою, преблаженне, память празднующе, молимся всегда: не остави нас сирых, но отеческою любовию окорми ко пристанищу тихому, верою и любовию восхваляющих тя.

Крепкою силою Христос Бог тя препояса и укрепи побеждати козни демонския, преподобне и богоносне отче Игнатие. Темже ныне молим тя: моли Человеколюбиваго Владыку, да избавит всех нас от вражиих нахождений и искушений, и спасет души наша.

Недостойными усты воспеваемое тебе малое хваление наше, отче святителю Игнатие, не презри, но приими, и всех, прославляющих тя, освяти, бед и напастей, и вечнаго мучения избавитися нам Господа умоли, Егоже с тобою величаем.

Богородичен: Прочее время жизни нашея сохрани неврежденно поможением Твоим, Дево Отроковице, и сподоби конец благий получити нам, воспевающим тя и взывающим: радуйся, Всеблаженная Богородице Чистая.

Светилен, глас 8. Священная и светоносная, паче ума светлейшая, отче Игнатие, память твоя, юже светло празднуем, возсия нам днесь. Сего ради славим прославльшаго тя Господа, давшаго ти благодать таковую, еюже ограждаеши стадо твое.

Слава и ныне, праздника, самоподобен:

Духом во святилище представ старец, на руки восприят закона Владыку, вопия: ныне со уз мя плотских разреши, якоже рекл еси с миром: видех бо очима откровение языков и Израилю спасение.

На хвалитех стихиры праздника, 3 и святаго, 3.

Стихиры праздника, глас 6.

Подобен: Тридневен:

Восприми, рече, Симеоне, Зиждителя всяческих руками: / о старче, подыми Христа, / Егоже Дева Отроковица роди без Семене / на радость роду нашему.

Закону Творца и Бога, / Егоже трепещут Ангельская множества, / сошедшеся, воспоим, людие, Единаго Благодетеля и закону Законодателя / во спасение душ наших.

Ныне отпущаеши, Владыко, раба Твоего, / якоже рекл еси, с миром, / яко видех Тя, Христе, Света Первовечнаго, / соуз мя плотских, / во откровение языков и Израилю.

Стихиры святаго, глас 8:

Подобен: Что вас наречем, святии:

Что тя наречем, Игнатие священне? / Звезду ли, путеводящую ко Христу? / Огнесветлый ли столп, / предводящий люди от ига агарянскаго? / Молнию ли, словесы божественными облистающую сердца верных? / Яко солнце светла твоя память, / моли спастися душам нашим.

Что тя ныне, Игнатие, именуем? / Пресвятаго ли Духа храм освященный? / Херувима ли, яко на тебе почил есть Христос? / Серафима ли, молитвою пламенеющаго? / Ангела ли, тела бо отвратился еси? / Моли, преподобне и богоблаженне, /от тли и бед избавитися / творящим верою память твою.

Что тя ныне наречем, чудне? / Виноград ли, свело прозябший гроздами веры и благочестия? / Источник ли, источающий глаголы медоточныя, / напаяющий сердца верных? / Святителей украшение, монахов правило, / Игнатие богомудре, / молися спастися душам нашим.

Слава, святителю, глас 2:

Возликовствуем, вернии, / в честнем торжестве дивнаго святителя / и любовию духовною днесь да воспоим иерарха, / Началопастыря Христа добраго возследователя, / положившаго душу свою за овцы, / веры Православныя и благочестия отеческаго поборника, / преблаженнаго Игнатия и приснопамятнаго, / о нас всегда молящагося ко Господу, / да подаст граду своему множество щедрот, / стране нашей мир и благоденствие, / и спасение душам нашим.

И ныне, праздника, глас 2:

Священнаго священная Дева принесе во святилище святителю,/ простер же руце Симеон, прият Сего, радуяся, / и возопи: ныне отпущаеши раба Твоего, Владыко, / по глаголу Твоему, с миром, Господи.

Славословие великое и отпуст. И бывает помазание братии от лампады святителя.

НА ЛИТУРГИИ

Блаженны от канона праздника песнь 3-я и святителя песнь 6-я. Прокимен, глас 1: Уста моя возглаголют премудрость / и поучение сердца моего разум. Стих: Услышите сия, вси языцы, / внушите, вси, живущие по вселенней. Апостол ко Евреем, зач. 335. Аллилуиа, глас 4: Уста праведнаго поучатся премудрости / и язык его возглаголет суд. Евангелие от Иоанна, зачало 36. Причастен: В память вечную будет праведник:

МОЛИТВА

О, великий Святителю и пастырю наш добрый, молитвенниче всея земли Приазовския и града Мариуполя основателю, отче священнейший Игнатие!

К тебе смиренно припадаем и усердно молимся: яви нам, грешным, любовь твою отеческую и многомощное твое заступление. Испроси предстательством твоим у Всемилостивого Бога нашего вся яже на пользу душам и телесем нашим, согрешений наших прощение, любовь нелицемерную, ревность о спасение нашем, да благодатию Его Божественною соблюдаеми и спасаеми, славу, благодарение и поклонение возсылаем Отцу и Сыну и Святому Духу, ныне и присно, и во веки веков. Аминь.

АКАФИСТ

Святителю Игнатию, Мариупольскому чудотворцу

Кондак 1.

Избранный чудотворче и града Мариуполя незыблемое основание, на небеси предстоя Святей Троице, приими песни и пения наша хвалебныя, и светом небесным озари сердца чад твоих, любовию вопиющих ти сице:

Радуйся, Игнатие, пастырю добрый и дивный святителю Христов.

Икос 1.

Ангельскому поревновавши житию, святителю отче Игнатие, любовию разжегл еси сердце твое, и яко серафим, молитвою пламенеющий, огнем Божественнаго Утешителя озаряеши души всех, пение сицевое тебе приносящих:

Радуйся, пастырю всеславный,

Радуйся, наставниче премудрый;

Радуйся, Христа преславный ученич?,

Радуйся, апостольских престолов наследниче;

Радуйся, ангелом сомолитвениче,

Радуйся, пророков сотаиниче;

Радуйся, святителей украшение,

Радуйся, всех христиан утешение;

Радуйся, Игнатие, пастырю добрый и дивный святителю Христов.

Кондак 2.

Видети потщался еси, еже око земнородных не виде, и слышати возжелел еси, еже не возможе слышати человек, на небеса добродетельми возшел еси, с безплотными песнь приносяще Богу: Аллилуиа.

Икос 2.

Разум имуще, благодатию Утешителя озаренный, не о земном мудрствовати тщался еси, но небесныя мудрости взыскав, во одежду жития иноческаго облеклся еси и всего себе в жертву всесовершенную Богу и Спасу своему принесл еси, сего ради похвалы воспеваешися сицевыми :

Радуйся, суету мирскую отринувый,

Радуйся, небесное житие восприемый;

Радуйся, иноческаго жития ревнителю,

Радуйся, демонскаго нечестия посрамителю;

Радуйся, отцем древним подражавый,

Радуйся, благодать небесную стяжавый;

Радуйся, на высоту безстрастия возшедый,

Радуйся, страстей пламень угасивый;

Радуйся, Игнатие, пастырю добрый и дивный святителю Христов.

Кондак 3.

Сила Господня и милость Его в немощи твоей явлена бысть, отче преславне Игнатие, и ангельстии лицы удивишася крепости твоей и демонскии полки возрыдаша, побеждени бывше молитвою твоею: Аллилуиа.

Икос 3.

Имуще талант веры, от Небеснаго Домовладыки ти данный, яко раб добрый и верный приумножил еси его и люди твоя ко Христу привел еси, от нихже похвалы слышиши сицевыя:

Радуйся, души наша Словом Божиим просветивый,

Радуйся, сердца наша питием благочестия напоивый;

Радуйся, неисчерпаемый премудрости источниче,

Радуйся, Вечнаго Евангелия всехвальный благовестниче;

Радуйся, яко тобою истина познавается,

Радуйся, яко молитвою твоею благодать верным подается;

Радуйся, Православныя веры хранителю,

Радуйся, людей христоименитых защитителю;

Радуйся, Игнатие, пастырю добрый и дивный святителю Христов.

Кондак 4.

Буря искушений и страстей волнения тщетны о тебе явишася, отче преславне, ихже ты силою всесладкаго имени Иисусова победил еси, непрестанно песнь победную Господу принося:Аллилуиа.

Икос 4.

Услыша Господь глас сердца твоего, иже песнь любви выну пред престолом Его воспеваше, и на новый подвиг тя призва, благодать служения архипастырского ти подавая. Темже паства, избранника воистину тя Божия ведуще, похвалы ти приносит:

Радуйся, святителю наш добрый,

Радуйся, отче милостивый и кроткий;

Радуйся, крест святительства от Господа приявый,

Радуйся, бремя архипастырства на рамена своя возложивый;

Радуйся, образе жития несквернаго,

Радуйся, явление служения непорочнаго;

Радуйся, благодати источниче неоскудеваемый,

Радуйся, милости кладезю неистощимый;

Радуйся, Игнатие, пастырю добрый и дивный святителю Христов.

Кондак 5.

Богодарованнаго и благодатнаго святителя своего тя разумеюще, люди православнии яко избранника Христова и Ангела церкве Готфейския тя прияша, Дивному во святых Своих Богу благодарение о тебе приносяще: Аллилуиа.

Икос 5.

Видевше пламень любви, еюже сердце твое разженно бысть, новаго тя Моисея призва Господь, да люди твоя от рабства агарянскаго изведеши и от нечестия избавиши и от бед свободиши всех, вопиющих ти:

Радуйся, огненный столпе, во тьме светлосияющий,

Радуйся, путь истинный нам указующий;

Радуйся, звездо, верных к Богу путеводящая,

Радуйся, солнце, путь ко Христу освещающее;

Радуйся, от прелести вражия избавляющий,

Радуйся, на стези правды нас наставляющий;

Радуйся, милостей Господних явление,

Радуйся, благоутробия Божественнаго знамение;

Радуйся, Игнатие, пастырю добрый и дивный святителю Христов.

Кондак 6.

Проповедует град Мариуполь славу и милосердие Господне, чрез служение твое явл?нныя, Церковь же Православная подвигом твоим украшается и вселенная вся благодарение о тебе Богу возсылает:Аллилуиа.

 

Икос 6.

Возсиял еси яко свеща многосветлая, на свещник кафедры архиерейския Господом поставленный, да житием и подвигом твоим св?тиши всем, взывающим ти сице:

Радуйся, светом небесным озаренный,

Радуйся, благодатию Божией освященный;

Радуйся, правды Христовой ревнителю,

Радуйся, Евангельския любве служителю;

Радуйся, града Мариуполя основание,

Радуйся, земли нашея утверждение;

Радуйся, страны эллинския преславное прозябение,

Радуйся, Церкви Русския всечудное украшение;

Радуйся, Игнатие, пастырю добрый и дивный святителю Христов.

Кондак 7.

Хотением возжелел еси ясти Пасху Господню и Вечери Тайныя причастник быти со апостолы, темже ныне, на брак Агнчий возшедый и вкусивый вечныя сладости в пренебесном Царствии, со апостолы и всеми святыми поеши Христу: Аллилуиа.

Икос 7.

Новаго Иерусалима достигл еси отче, путем шествуя заповедей Христовых. Ныне же, в незаходимой славе сияюще и Бога выну зряще, к Нему путь указуеши всем, поющим ти сице:

Радуйся, спасения многих взыскавый,

Радуйся, вся любовию объявый;

Радуйся, Отечества земнаго верный сыне;

Радуйся, Небеснаго Иерусалима преславный гражданине.

Радуйся, Архиерея Вечнаго служителю всеусердный;

Радуйся, Небеснаго Домовладыки рабе благий и верный.

Радуйся, жатвы Господней делателю неленостный;

Радуйся, о людех православных молитвенниче предивный.

Радуйся, Игнатие, пастырю добрый и дивный святителю Христов.

Кондак 8.

Страннолюбия Владычня и безсмертныя трапезы на горнем месте Сиона вкусил еси, отче наш Игнатие, и ныне к радости Пасхи Вечныя призываеши всех нас, пети научая Христу Господу ангельскую песнь: Аллилуиа.

Икос 8.

Весь освятился еси огнем благодати Духа Всесвятаго и явился еси храм боголепный Божественныя Троицы, добродетельми светлоукрашенный. Темже молитвою твоею и нас от всякия скверны очисти, да похвалу ти непрестанно приносим:

Радуйся, молитвами твоими освящающий,

Радуйся, огня геенскаго нас избавляющий;

Радуйся, фимиаме молитвы сладкоуханный,

Радуйся, сосуде, благодатию исполненный,

Радуйся, крине прозябения райскаго,

Радуйся, лозо вертограда Эдемскаго;

Радуйся, росо, еюже огнь безбожия угашается,

Радуйся, море, имже зловерие потопляется;

Радуйся, Игнатие, пастырю добрый и дивный святителю Христов.

Кондак 9.

Всякия скорби претерпел еси, отче богомудре Игнатие, со Апостолом вопия: вся могу о укрепляющем мя Иисусе. Темже от скорби многомятежныя мира сего свободи ны, чада твоя духовныя, да с тобою купно возможем песнь Спасу и Христу приносити Аллилуиа.

Икос 9.

Витийствующие уста не возмогут по долгу память твою похвалити, како же мы недостойнии пение ти дерзнем немощное принести, обаче, любовию побеждаеми, со смирением тя ублажаем:

Радуйся, любовию твоею всему миру возсиявый;

Радуйся, добродетельным житием вся облиставый.

Радуйся, пищею райскою нас насыщающий,

Радуйся, питием бессмертия напаяющий;

Радуйся, скорбных утешение,

Радуйся, заблуждающих вразумление;

Радуйся, недугов врачевание,

Радуйся, в трудах вспомоществование;

Радуйся, Игнатие, пастырю добрый и дивный святителю Христов.

Кондак 10.

Спасения нашего буди ходатай, отче преславне Игнатие, вемы бо тя воистину дивнаго предстателя пред Престолом величествия Божия, темже Владыку всяческих моли о граде твоем и о всем мире, да в тишине и умилении поем Ему: Аллилуиа.

Икос 10.

Стена прилогов вражиих молитвою твоею разорена бысть, отче наш всеславный Игнатие и людие, тобою от недугов и скорбей избавление приемлюще, пения ти приносят и славословия сицевые:

Радуйся, мечу, злочестие посецающий,

Радуйся, щите, верных ограждающий;

Радуйся, дела наша к славе Божией исправляющий,

Радуйся, к доброделанию всех призывающий;

Радуйся, благочестия насадителю,

Радуйся, злочестия обличителю;

Радуйся, крепкое падающих возведение,

Радуйся, право стоящим утверждение;

Радуйся, Игнатие, пастырю добрый и дивный святителю Христов.

Кондак 11.

Пение уст твоих, от избытка сердца Господу возносимое, яко жертву благоприятную, яко фимиам многоценный прият Вседержитель. Тако и ты моление наше немощное прими и славословие уст недостойных исправи, да неосужденно взываем Дивному во святых Своих Господу: Аллилуиа.

Икос 11.

Светолепною ризою спасения и одеждою нетления облече тя Христос Спас и Владыка, и венцем небесным увенча главу твою и лику избранных причте; темже в славе Царствия Небеснаго слышиши похвалы сия:

Радуйся, Царствия Христова наследниче,

Радуйся, Пасхи вечныя причастниче;

Радуйся, яко тобою бесовския полки отгоняются,

Радуйся, яко тобою верныя радости исполняются;

Радуйся, яко тобою от напастей избавляемся,

Радуйся, яко тобою благодати сподобляемся;

Радуйся, яко предстательством твоим жизнь вечная обретается,

Радуйся, яко молитвами твоими вера истинная познавается.

Радуйся, Игнатие, пастырю добрый и дивный святителю Христов.

Кондак 12.

Благодать Господня, яже присно немощная врачует и оскудевающая восполняет, обильно на тя излияна бысть от Щедродателя Бога, темже, яко семя доброе, мног плод принесл еси Божественному Сеятелю, Ему же с тобою пение приносим: Аллилуиа.

Икос 12.

Воспевающе песни духовныя, со ангельскими лики Господу благодарение приносим, яко даровал есть нам тя многоценное сокровище и предстателя о пастве твоей, яже ти присно похвалы возсылает:

Радуйся, заступление наше всекрепкое,

Радуйся, пение наше хвалебное;

Радуйся, чад твоих радосте,

Радуйся, земли нашея сокровище;

Радуйся, ликов ангельских веселие чудное,

Радуйся, народа Божия похвало всеславная;

Радуйся, всех любовию своею объемлющий,

Радуйся, приходящих радостно приемлющий;

Радуйся, Игнатие, пастырю добрый и дивный святителю Христов.

Кондак 13.

О, преславне и всечудне отче наш Игнатие, немощных устен пение недостойное днесь от любви ти приносимое приими и от всякаго зла ны неврежденны сохрани, да молитвою твоею присно укрепляеми, невечерняго дне Царствия Христова достигнем и с тобою пети сподобимся: Аллилуиа.

Сей кондак глаголется трижды; таже икос 1 и кондак 1.